“Og‘usiz hayot sari” – ezgulikka chorlovchi tanlov
Termiz davlat pedagogika institutida talaba-yoshlarning bo‘sh vaqtlarini mazmunli o‘tkazish, ularni ijodkorlikka yo‘naltirish hamda ma’naviy-ma’rifiy jihatdan qo‘llab-quvvatlash maqsadida ochiq osmon ostida “Og‘usiz hayot sari” mavzusida tasviriy san’at yo‘nalishi talabalari ishtirokida rasmlar tanlovi tashkil etildi.
Tanlov davomida yosh ijodkorlar o‘z asarlarida giyohvandlikning inson hayotiga soladigan xavf-xatarlari, uning shaxs va jamiyat taraqqiyotiga ko‘rsatadigan salbiy oqibatlarini turli badiiy obrazlar orqali yoritib berishdi. Har bir ishtirokchining ijodiy yondashuvi, tasviriy san’at orqali ezgulik, sog‘lom turmush tarzi va hayot go‘zalligini targ‘ib etishi tadbirga alohida ruh bag‘ishladi.
Mazkur tadbir talabalarda nafaqat san’atga bo‘lgan mehr-muhabbatni, balki sog‘lom turmush tarziga, ezgulik va ma’rifatga intilish tuyg‘ularini ham mustahkamladi.