Termiz davlat pedagogika institutida ilmiy-tadqiqot faoliyati professor-o‘qituvchilar, doktorantlar, mustaqil izlanuvchilar, yosh tadqiqotchilar va iqtidorli talabalarni ilmiy jarayonlarga tizimli jalb etish, ilmiy salohiyatni oshirish, xalqaro ilmiy bazalarda natijadorlikka erishish hamda ilmiy ishlanmalarni amaliyotga yo‘naltirishga qaratilgan. Institutda ilmiy faoliyat O‘zbekiston Respublikasining ilm-fan, innovatsiya va oliy ta’lim sohasidagi normativ-huquqiy hujjatlari asosida tashkil etiladi.
Institutda ilmiy-tadqiqot faoliyatini tashkil etishda O‘zbekiston Respublikasi Prezidentining 2018-yil 5-iyundagi “Oliy ta’lim muassasalarida ta’lim sifatini oshirish va ularning mamlakatda amalga oshirilayotgan keng qamrovli islohotlarda faol ishtirokini ta’minlash bo‘yicha qo‘shimcha chora-tadbirlar to‘g‘risida”gi PQ-3775-son Qarori, oliy ta’lim, ilm-fan, innovatsion faoliyat, doktorantura, ilmiy darajalar berish, intellektual mulk va xalqaro ilmiy hamkorlikka oid amaldagi normativ hujjatlar talablari asos qilib olinadi. Ushbu yo‘nalishda belgilangan vazifalar ilmiy bo‘lim, kafedralar, fakultetlar, ilmiy rahbarlar va mas’ul tarkibiy bo‘linmalar hamkorligida amalga oshiriladi.
Kafedralar professor-o‘qituvchilari va xodimlarining ilmiy, amaliy hamda innovatsion loyihalar tanlovlarida ishtirokini targ‘ib qilish, loyiha hujjatlarini tayyorlash va tanlovlarga taqdim etish bo‘yicha amaliy-uslubiy yordam ko‘rsatiladi.
Doktorant, tayanch doktorant, mustaqil izlanuvchi va ilmiy xodimlarning ilmiy faoliyatini muvofiqlashtirish, dissertatsiya mavzularini OAK bazasiga kiritish hamda ilmiy rahbarlik jarayonlari bo‘yicha uslubiy sharoit yaratiladi.
Kafedralarning ilmiy-tadqiqot ishlari rejalari o‘rganiladi, tahlil qilinadi va ularni takomillashtirish bo‘yicha takliflar ishlab chiqiladi. Professor-o‘qituvchilarning ilmiy va innovatsion faoliyati monitoring qilinadi.
Respublika va xalqaro ilmiy-amaliy anjumanlar, ilmiy seminarlar, forumlar va konferensiyalarni rejalashtirish, tashkil etish va o‘tkazish muvofiqlashtiriladi. Boshqa OTMlarda o‘tkaziladigan konferensiyalarda ishtirok ta’minlanadi.
Scopus va Web of Science xalqaro ilmiy-texnik ma’lumotlar bazalaridan foydalanish, xalqaro ilmiy jurnallarga maqolalar tayyorlash, nashr qilish va iqtiboslik ko‘rsatkichlarini oshirish bo‘yicha seminar-treninglar tashkil etiladi.
Iqtidorli yoshlar va a’lochi talabalarni ilmiy ishlarga jalb etish, talabalar ilmiy ishlari ko‘rgazmalari, fan olimpiadalari, tanlovlar va ilmiy loyihalarda faol ishtirokini ta’minlash bo‘yicha ishlar olib boriladi.
O‘zbekiston Respublikasi Prezidenti davlat stipendiyasi, nomli davlat stipendiyalari va doktorantlar uchun stipendiya tanlovlarida nomzodlarni tayyorlash, hujjatlarni shakllantirish va natijadorlikka erishish ishlari tashkil etiladi.
Professor-o‘qituvchilar, xodimlar va iqtidorli talabalarning “Innovatsion g‘oyalar, ishlanmalar va loyihalar” yarmarkalari, tanlovlari hamda amaliyotga yo‘naltirilgan tadbirlarda ishtiroki ta’minlanadi.
Ilmiy-tadqiqot ishlari uchun moddiy-texnika bazasini mustahkamlash, ilmiy-texnikaviy hamkorlikni rivojlantirish, raqobatbardosh ilmiy ishlanmalar va texnologiyalar yaratishga ko‘maklashiladi.