Termiz davlat pedagogika institutida 2026-yil 16-iyul kuni "Mehnat yarmarkasi" loyihasi bo'yicha

Institutda 2026-yil 16-iyul kuni "Mehnat yarmarkasi" loyihasi doirasida talabalarning mehnat bozori haqidagi bilimlarini oshirish, ularni kasb tanlash, ishga joylashish va o'z biznesini yuritishga yo'naltirish maqsadida tadbir tashkil etildi. Tadbirda "Tadbirkorlik asoslari" fani o'qituvchilari talabalarga loyiha imkoniyatlari haqida batafsil ma'lumot berdi.

O'qituvchilar loyihaning 4 ta yo'nalishi bo'yicha bo'sh ish o'rinlari, ishga joylashish tartibi, shuningdek, tadbirkorlik faoliyatini boshlash uchun kredit olish va uni maqsadli hamda oqilona sarflash masalalari yuzasidan tushuncha berdi. Bundan tashqari, talabalarga o'z kasbi va qiziqishiga mos ish yo'nalishini tanlash, rezyume tayyorlash, ish beruvchi bilan muloqot qilish, biznes g'oyani rejalashtirish va kredit olish uchun zarur hujjatlar bo'yicha amaliy tavsiyalar berildi.

Tadbir davomida talabalar bilan davra suhbati o'tkazildi.

Tadbirda so'zga chiqqan Talabalar amaliyoti bo'limi boshlig'i F.Pardayev yoshlarning ertangi kuni va kelajagi uchun davlatimiz rahbari tomonidan yaratib berilayotgan keng imkoniyatlar haqida to'xtalib o'tdi. U yoshlarga ta'lim, kasb tanlash, ish bilan ta'minlash va tadbirkorlikni boshlash uchun yaratilayotgan shart-sharoitlar, imtiyozli kredit va qo'llab-quvvatlash mexanizmlari mohiyatini tushuntirdi. Shuningdek, talabalarni mehnat yarmarkalarida taqdim etilayotgan imkoniyatlardan o'z vaqtida va samarali foydalanishga, o'z ustida muntazam ishlashga, bilim va ko'nikmalarini doimiy oshirib borishga, mustaqil fikrlaydigan va tashabbuskor bo'lishga chaqirdi.

F.Pardayev ta'kidlaganidek, bugungi kunda yoshlar uchun yaratilayotgan imkoniyatlar ularning mehnat bozorida o'z o'rnini topishi, mustaqil daromad manbaiga ega bo'lishi va jamiyat rivojiga hissa qo'shishi uchun mustahkam zamin bo'lib xizmat qiladi. Shu sababli har bir talaba bu imkoniyatlarni e'tibordan chetda qoldirmasdan, o'z kelajagi uchun oqilona foydalanishi lozim.

Tadbir yoshlarda mehnat bozoriga qiziqishni oshirish, ularning moliyaviy savodxonligini yuksaltirish hamda kelajakda ishga joylashish yoki o'z biznesini yo'lga qo'yishga bo'lgan ishonchini mustahkamlashga xizmat qildi.

 

 

Talabalar amaliyoti bo'limi boshlig'i F.Pardayev