I. UMUMIY QOIDALAR
1. O‘quv-uslubiy boshqarma to‘g‘risidagi namunaviy Nizom (keyingi o‘rinlarda Nizom deb yuritiladi) O‘zbekiston Respublikasining “Ta’lim to‘g‘risida”gi Qonuni, O‘zbekiston Respublikasi Prezidentining “O‘zbekiston Respublikasi oliy ta’lim tizimini 2030-yilgacha rivojlantirish konsepsiyasini tasdiqlash to‘g‘risida” 2019-yil 8-oktabrdagi PF-5847-son Farmoni hamda oliy ta’lim, fan va innovatsiyalar vazirining buyruqlariga asosan ishlab chiqilgan bo‘lib, Termiz davlat pedagogika institutida (keyingi o‘rinlarda — Institut) O‘quv-uslubiy boshqarma faoliyatini tashkil etish tartibini belgilaydi.
2. O‘quv-uslubiy boshqarma o‘z faoliyatini O‘zbekiston Respublikasining Konstitutsiyasi, O‘zbekiston Respublikasining “Ta’lim to‘g‘risida”gi Qonuni, O‘zbekiston Respublikasi Oliy Majlisi palatalarining qarorlari, O‘zbekiston Respublikasi Prezidentining farmon, qaror va farmoyishlari, O‘zbekiston Respublikasi Vazirlar Mahkamasining qaror va farmoyishlari, O‘zbekiston Respublikasi oliy ta’lim, fan va innovatsiyalar vazirining buyruqlari va Vazirlik Hay’ati qarorlari, Institut Ustavi, Institut Kengashi qarorlari, Institut rektorining buyruqlari hamda mazkur Nizomga muvofiq olib boradi.
3. O‘quv-uslubiy boshqarma faoliyatiga Institut rektori tomonidan tayinlanadigan va lavozimidan ozod etiladigan Boshqarma boshlig‘i rahbarlik qiladi.
Boshqarma boshlig‘i Institutning o‘quv ishlari bo‘yicha prorektoriga bo‘ysunadi hamda fakultet, kafedra va boshqa ta’lim tuzilmalari bilan hamkorlikda ishlaydi.
4. O‘quv-uslubiy boshqarma boshlig‘i rahbar xodimlar (fakultet dekani) toifasiga kiradi.
5. O‘quv-uslubiy boshqarma boshlig‘i Institut Kengashining a’zosi hisoblanadi.
6. Mazkur namunaviy Nizom asosida Institutning “Oliy ta’lim tashkiloti o‘quv-uslubiy boshqarmasi to‘g‘risidagi Nizomi” ishlab chiqildi.
7. Institut Kengashining 2025-yil ____-avgustdagi ___-sonli qaroriga asosan tasdiqlangan Nizom O‘quv-uslubiy boshqarma faoliyatida asosiy me’yoriy hujjat hisoblanadi.
II. O‘QUV-USLUBIY BOSHQARMA TUZILMASI VA BOSHQARUVI
8. O‘quv-uslubiy boshqarma bakalavriat ta’lim yo‘nalishlari va magistratura mutaxassisliklari bo‘yicha oliy ta’lim dasturlarini amalga oshiradigan Institutning tarkibiy tuzilmasi hisoblanadi.
9. Boshqarmaning vazifalaridan kelib chiqqan holda O‘quv-uslubiy boshqarma boshlig‘i tomonidan Institutning o‘quv ishlari bo‘yicha prorektori bilan kelishilgan holda tavsiya etilgan O‘quv-uslubiy boshqarmaning tuzilmasi va shtatlar jadvali Institut rektori tomonidan tasdiqlanadi.
10. O‘quv-uslubiy boshqarma tarkibiga quyidagilar kiradi:
- O‘quv-metodik ta’minot bo‘limi;
- Ta’lim jarayonlarini tashkil etish bo‘limi (kunduzgi, kechki, sirtqi, masofaviy, dual, muqobil ta’lim);
- Magistratura bo‘limi;
- Talabalar amaliyoti bo‘limi;
- Akademik litsey va texnikumlarga metodik yordam berish sektori.
11. O‘quv-uslubiy boshqarmani oliy ma’lumotli, kamida 3 yil oliy ta’lim tizimida boshqaruv va 5 yil ilmiy yoki pedagogik tajribaga ega bo‘lgan, ilmiy darajaga yoki ilmiy unvonga ega bo‘lgan, ta’lim dasturlarini tuzish, o‘quv jarayonini samarali tashkil etish va uning o‘quv-uslubiy ta’minoti bo‘yicha mukammal bilim va amaliy ko‘nikmalarga ega bo‘lgan, kafedra va dekanatning funksional vazifalarini, oliy ta’lim sohasidagi davlat siyosatini amalga oshiradigan Boshqarma boshlig‘i boshqaradi.
12. O‘quv-uslubiy boshqarma boshlig‘iga bo‘ysunadigan va O‘quv-uslubiy boshqarma tarkibiga kiradigan bo‘limlarni oliy ma’lumotli, kamida 5 yil ilmiy yoki pedagogik tajribaga ega bo‘lgan, ilmiy darajaga yoki ilmiy unvonga ega bo‘lgan, o‘quv jarayonining o‘quv-uslubiy ta’minoti bo‘yicha bilim va amaliy ko‘nikmalarga ega bo‘lgan, oliy ta’lim sohasidagi davlat siyosatini biladigan hamda Boshqarma boshlig‘ining tavsiyasiga asosan Institut rektori tomonidan lavozimga tayinlanadigan va lavozimidan ozod etiladigan bo‘lim boshliqlari boshqaradi.
13. O‘quv-uslubiy boshqarma boshlig‘i kasalligi yoki mehnat ta’tilida bo‘lgan davrida uning vazifasini o‘rinbosari yoki vazifasi yuklatilgan shaxs bajaradi.
14. O‘quv-uslubiy boshqarma tarkibidagi bo‘limlarga kamida 3 yil ilmiy yoki pedagogik tajribaga ega bo‘lgan, o‘quv-uslubiy faoliyat asoslarini yaqindan biladigan, bevosita bo‘lim boshliqlari va O‘quv-uslubiy boshqarma boshlig‘iga bo‘ysunadigan xodimlar O‘quv-uslubiy boshqarma boshlig‘ining tavsiyasiga ko‘ra Institut rektorining buyrug‘i asosida lavozimga tayinlanadi va lavozimidan ozod etiladi.
15. O‘quv-uslubiy boshqarma xodimlari o‘z faoliyatini tasdiqlangan lavozim yo‘riqnomalariga va ular bilan tuzilgan mehnat shartnomasiga asosan amalga oshiradi. O‘quv-uslubiy boshqarma xodimlarining lavozim vazifalari ilovaga muvofiq belgilanadi.
16. O‘quv-uslubiy boshqarma xodimlarining ish majburiyatlari O‘quv-uslubiy boshqarma boshlig‘i tomonidan ularga qo‘yilgan funksional vazifalardan kelib chiqqan holda belgilanadi.
III. O‘QUV-USLUBIY BOSHQARMANING MAQSADI VA VAZIFALARI
17. O‘quv-uslubiy boshqarmaning maqsadi — Institutning o‘quv jarayonini rejalashtirish, tashkil etish, boshqarish, ta’lim faoliyatini takomillashtirish, ta’lim sifati va samaradorligini oshirish.
18. O‘quv-uslubiy boshqarmaning vazifalariga quyidagilar kiradi:
- Institutda ta’lim dasturlarini amaldagi kasbiy standartlar, “Oliy ta’limning davlat ta’lim standarti. Asosiy qoidalar”, “Oliy ta’limning davlat ta’lim standarti. Oliy ta’lim yo‘nalishlari va mutaxassisliklari klassifikatori” (keyingi o‘rinlarda — DTS) va ta’lim dasturlari (malaka talabi, o‘quv reja, o‘quv dasturlari, sillabuslar) hamda boshqa me’yoriy-uslubiy hujjatlar asosida amalga oshirishni tashkil etish va boshqarish;
- Institutda o‘quv reja va dasturlarni ishlab chiqish, o‘quv jarayoni jadvalini shakllantirish, ta’lim jarayonini tashkil etish, fakultet, kafedra, bo‘lim va markazlarning ta’lim jarayonini muvofiqlashtirish sohasiga oid qonunchilik hujjatlari va idoraviy hujjatlar ijrosini ta’minlash;
- o‘quv jarayonini rejalashtirish, tashkil etish hamda nazorat qilish, o‘quv jarayoniga ilg‘or pedagogik va innovatsion texnologiyalarni keng jalb qilish;
- yuqori malakali mutaxassislarni tayyorlash, qayta tayyorlash va malaka oshirishda zamonaviy talablar va ilg‘or xalqaro tajribaga asoslangan zamonaviy o‘qitish usullarini tatbiq etish;
- o‘quv jarayoni va o‘quv-uslubiy hujjatlar tayyorlanishida kasbiy standartlar, oliy ta’limning DTS va malaka talablariga rioya etish;
- nazariy bilimlarni chuqurlashtirishga, amaliy va kasbiy ko‘nikmalar hamda ta’limni rivojlantirishga qaratilgan faoliyatni tashkil etish va tizimli monitoringini amalga oshirish;
- monitoring natijalari yuzasidan takliflar ishlab chiqish va semestr hamda yil yakunida Institut Kengashi muhokamasiga olib chiqish;
- masofaviy va dual ta’lim shakllarida ta’lim oluvchilarning modullarni o‘z vaqtida va sifatli o‘zlashtirishini hamda ishtirokini monitoring qilish;
- professor-o‘qituvchilarning pedagogik faoliyati hamda o‘qitish sifati va samaradorligini tahlil qilish, baholash hamda ularning kasbiy va pedagogik mahoratlarini yuksaltirishga oid tadbirlarni tashkillashtirish;
- talabalar bilimini nazorat qilish va baholash faoliyatini muvofiqlashtirish;
- Registrator ofisi bilan hamkorlikda fakultetlar tomonidan taqdim etilgan ma’lumotlar asosida talabalar kontingentini fakultetlar kesimida jamlash, umumiy hisobini shakllantirish va yuritish;
- yangi avlod darsliklari va o‘quv qo‘llanmalarining yaratilishi, ularning muntazam yangilab borilishini monitoring qilish va tegishli takliflarni ishlab chiqish;
- Institutda ta’lim dasturlarini amalga oshirishning metodik ta’minotini tahlil etib borish va metodik yordam ko‘rsatish;
- Institut tuzilmalari faoliyatini to‘laqonli amalga oshirish uchun o‘quv jarayoni bilan bog‘liq masalalarda lokal hujjatlarni ishlab chiqish;
- xalqaro aloqalarga mas’ul bo‘lgan bo‘linmalar bilan birgalikda talabalarning akademik almashinuvini ta’minlash bo‘yicha yetakchi xorijiy oliy ta’lim tashkilotlari, ilmiy-tadqiqot muassasalari, tadqiqot markazlari va xalqaro tashkilotlar bilan hamkorlik qilish bo‘yicha takliflar ishlab chiqish va boshqalar.
IV. O‘QUV-USLUBIY BOSHQARMANING FUNKSIYALARI
19. O‘quv-uslubiy boshqarma o‘ziga yuklatilgan vazifalarni amalga oshirishda quyidagi funksiyalarni bajaradi:
1) O‘quv va o‘quv jarayonlarini tashkil etish sohasida:
- Institut fakultetlari va kafedralarida o‘quv faoliyatini rejalashtirish, tashkil etish va ta’lim dasturlarini amalga oshirishga rahbarlik qilish;
- Institutning tegishli tuzilmalarida, jumladan, kafedralar tomonidan o‘quv reja va dasturlar ishlab chiqilishini tashkil etish va nazorat qilish;
- ishlab chiqilgan ta’lim dasturlarining amaldagi normativ-huquqiy hujjatlar va Institutning lokal hujjatlariga muvofiqligini tahlil qilish va ekspertizadan o‘tkazish;
- Institutning tegishli tuzilmalari (fakultet va kafedralar)ning malaka talablari, o‘quv reja va o‘quv dasturlari bilan ta’minlanganlik holatini nazoratga olish;
- o‘quv jarayoni grafigi, dars jadvallari, oraliq va yakuniy nazorat jadvallari hamda davlat attestatsiyasi jadvallarini tuzish, muvofiqlashtirish va nazorat qilish;
- Institut auditoriya fondi hisobini yuritish va mutanosib ravishda taqsimlanishini nazoratga olish;
- tasdiqlangan jadvallarga muvofiq o‘quv mashg‘ulotlari, oraliq va yakuniy nazoratlar hamda davlat yakuniy attestatsiyalarining o‘tkazilishi va baholanishini nazorat qilish;
- professor-o‘qituvchilarning o‘quv yuklamalarini shakllantirish me’yorlarini belgilash;
- professor-o‘qituvchilarning yillik o‘quv yuklamalarini va shtatlar jadvalini shakllantirish;
- kafedra professor-o‘qituvchilari o‘rtasida o‘quv yuklamalarining optimal taqsimlanishini va soatbay fondning ishlatilishini nazorat qilish;
- kafedralarning yillik ish rejalarini va professor-o‘qituvchilarning shaxsiy ish rejalarini ishlab chiqishda tashkiliy-metodik tavsiyalar berish;
- Institut bitiruvchilariga ta’lim hujjatlarida beriladigan kvalifikatsiyalarni (malakalarni) nazorat qilish;
- talabalarni ta’lim grantidan to‘lov-kontrakt shakliga o‘tkazilishini tashkil etish va nazoratga olish;
- ta’lim jarayonini tashkil etadigan tuzilmalarga o‘quv reja va dasturlarni ishlab chiqish, normativ-huquqiy hujjatlar va o‘quv jarayoniga tegishli boshqa masalalar bo‘yicha maslahatlar berish;
- talabalarning semestrlar bo‘yicha o‘zlashtirish ko‘rsatkichlari, yakuniy davlat attestatsiyalari natijalari va yuqori instansiyalarning topshirig‘iga asosan boshqa tahliliy ma’lumotlarni tayyorlash hamda monitoring olib borish;
- yuqori instansiyalardan kelib tushgan buyruqlar, farmoyishlar, topshiriqlar va Institut rahbariyati topshiriqlarini bajarish.
