Surxondaryo viloyatini ijtimoiy-iqtisodiy rivojlantirishga qaratilgan e’tibor va topshiriqlari ijrosi doirasida viloyatda so‘nggi yillarda ko‘plab ijtimoiy soha, infratuzilma va kommunikatsiya obyektlari barpo etilmoqda.

Bugun ham Surxondaryo viloyatida umumiy qiymati 55 milliard so‘m bo‘lgan 29 ta yangi obyekt foydalanishga topshirildi. Ularning tarkibida 19 ta ta’lim muassasasi, 3 kilometr ichki yo‘l va 8 ta boshqa turdagi inshootlar mavjud.

Shu munosabat bilan Termiz tumanidagi "Yangi O‘zbekiston" massivida Termiz davlat pedagogika instituti uchun qurilgan, umumiy qiymati 41 milliard so‘mdan ortiq bo‘lgan 1 500 o‘rinli zamonaviy o‘quv binosi foydalanishga topshirildi. Tadbirda Surxondaryo viloyati hokimi Ulug‘bek Qosimov ishtirok etdi.

Tadbir doirasida videokonferensaloqa orqali boshqa yangidan qurilgan obyektlar ham aholi va tarmoqlar foydalanishiga topshirildi.

Viloyat rahbari bu ishlar Prezidentimizning Surxondaryo viloyatini har tomonlama rivojlantirishga qaratayotgan doimiy e’tibori samarasi ekanligini ta’kidlab, yil yakuniga qadar yana bir qator muhim obyektlarni foydalanishga topshirish rejalashtirilganini qayd etdi.

Tadbir ishtirokchilari yangi o‘quv binosida talabalarning zamonaviy bilim va kasblarni egallashlari uchun yaratilgan sharoitlar bilan yaqindan tanishishdi.