Termiz davlat pedagogika institutida xalqaro miqyosdagi ilmiy-ma’rifiy tadbir – “PISA – 2000–2025-yillardagi tadqiqotlar, vazifalar va natijalar” mavzusida ochiq ma’ruza tashkil etildi.
Mazkur ma’ruzani Germaniyadan tashrif buyurgan professor Dr. Klaus Dautel hamda Termiz davlat pedagogika instituti o‘qituvchisi Sarvar Muxammadiyev olib bordilar. Tadbirda institut professor-o‘qituvchilari, talabalar va ta’lim sohasiga qiziquvchi mutaxassislar faol ishtirok etdilar.
Ma’ruza uch tilda — nemis, ingliz va o‘zbek tillarida olib borildi. Unda PISA xalqaro baholash dasturining 2000–2025-yillar davomida o‘tkazilgan tadqiqotlari, ularning metodikasi, o‘quvchilarning savodxonlik darajasini baholashdagi yondashuvlar hamda eng so‘nggi natijalar tahlil qilindi.
Tadbir davomida professor Dautel o‘zining yillar davomida PISA dasturida olib borgan tajribalari bilan o‘rtoqlashdi. Shuningdek, Sarvar Muxammadiyev O‘zbekiston ta’lim tizimida PISA talablariga mos kompetensiyalarni shakllantirish yo‘nalishida amalga oshirilayotgan ishlar haqida ma’lumot berdi.
Ma’ruza tinglovchilar uchun nihoyatda foydali bo‘ldi. Ishtirokchilar xalqaro tajribalar asosida o‘z kasbiy bilimlarini boyitdilar va zamonaviy ta’lim sifatini oshirishga qaratilgan dolzarb g‘oyalar bilan tanishdilar.
Tadbir yakunida ishtirokchilar o‘z minnatdorchiliklarini bildirib, kelgusida shunday ilmiy-ma’rifiy uchrashuvlar muntazam o‘tkazilib turishini ma’qulladilar.