Termiz davlat pedagogika instituti Tillar fakulteti malakaviy amaliyot yakunlari bo‘yicha hisobot tadbiri tashkil etildi.
Termiz davlat pedagogika instituti Tillar fakulteti Xorijiy til va adabiyoti yo‘nalishi 2-kurs talabalarining bir oylik malakaviy amaliyoti muvaffaqiyatli yakunlandi. 2025-yil oktabr oyida o‘quv rejasiga muvofiq ravishda Surxondaryo viloyatidagi umumta’lim maktablari, ixtisoslashgan maktablar va boshqa ta’lim muassasalarida o‘tkazilgan amaliyot davomida talabalar dars jarayonlarini kuzatish, dars ishlanmalari tahlili, o‘quvchilar bilan individual ishlash hamda baholash mezonlarini o‘rganish kabi zaruriy bilim va ko‘nikmalarni egalladilar.
Bugun institut miqyosida ushbu malakaviy amaliyot yakuniga bag‘ishlangan hisobot yig‘ilishi o‘tkazildi. Bo‘lib o‘tgan yakuniy hisobot tadbirida talabalar o‘z kuzatuv va tahlillarini taqdimot jadvallari, slaydlar va metodik ishlanmalar yordamida batafsil bayon etdilar. Tadbirda kafedra mudirlari va professor-o‘qituvchilar amaliyot jarayoniga oid natijaviy tahlillarni muhokama qilib, talabalar uchun foydali tavsiyalar berdilar.
Bu kabi tadbirlar amaliyot jarayonining samaradorligini oshirishga hamda talabalar malakasini mustahkamlashga xizmat qiladi, shuningdek institut va ta’lim muassasalari o‘rtasidagi hamkorlikni yanada rivojlantirishga asos bo‘ladi.