“Kelajakka qadam”: bitiruvchilar taqdiri – davlat eʼtiborida

5-iyul kuni Oliy taʼlim, fan va innovatsiyalar vaziri Qoʻngʻirotboy Sharipov rahbarligida “Kelajakka qadam” dasturi ijrosi hamda bitiruvchilarni bandlikka yoʻnaltirish boʻyicha amalga oshirilayotgan ishlar muhokamasiga bagʻishlangan kengaytirilgan yigʻilish boʻlib oʻtdi. Toshkent shahridagi vazirlik binosida oflayn, viloyatlardagi markaziy studiyalar orqali onlayn tarzda tashkil etilgan yigʻilishda barcha oliy taʼlim muassasalari rahbarlari, masʼul prorektorlar va hududiy boʻlinma boshliqlari ishtirok etdi.

Yigʻilishda Prezident topshiriqlariga muvofiq, bitiruvchilarning mehnat bozorida oʻz oʻrnini topishi, “Kelajakka qadam” dasturining toʻliq va samarali ijrosi masalalari muhokama etildi. Vazir Q.Sharipov oʻz nutqida bu yoʻnalishdagi vazifalar milliy ahamiyatga ega ekanini alohida taʼkidladi.

“Bitiruvchilarning bandligini taʼminlash – bugungi kundagi hayot-mamot masalasi. Har bir talabaning taqdiri – davlat rahbarining, oliygoh rektorining, hududiy boshqarmaning shaxsiy masʼuliyatidir”, – deya vazir qayd etdi.

Yigʻilishda “Oʻzmilliybank” AJ, Kambagʻallikni qisqartirish va bandlik vazirligi, Savdo-sanoat palatasi, Yoshlar ishlari agentligi va Iqtisodiyot hamda moliya vazirligi mutasaddilari ishtirok etib, faol hamkorlik va hamohanglik zarurligi alohida koʻrsatib oʻtildi