Termiz davlat pedagogika institutida ijodkor talabalarga mo‘ljallangan “Mushoira” klubi a’zolari tomonidan “Yangi yil — yangi umidlar” shiori ostida yangi yil tadbiri tashkil etildi.

Tadbirni Tillar fakultetining ma’naviy-ma’rifiy va yoshlar masalalari bo‘yicha dekan o‘rinbosari Chorshanbi Nodirov ochib berib, talabalarni kirib kelayotgan 2026-yil bilan samimiy tabrikladi hamda ularga o‘qish va ijodda ulkan muvaffaqiyatlar tiladi.

Shundan so‘ng “Mushoira” klubi rahbari, O‘zbek tili va adabiyoti kafedrasi o‘qituvchisi Farida Xakimova so‘zga chiqib, klubning 2025-yil davomida erishilgan yutuqlari, amalga oshirilgan ijodiy ishlar va istiqboldagi rejalar haqida ma’lumot berdi.

Tadbir davomida tyutor Nodira Jo‘rayeva ham talabalarni yangi yil bilan qutlab, ularga ijodiy izlanishlarida bardavom bo‘lishlarini tiladi.

Dastlabki qismda klub a’zolari o‘rtasida zakovat bellashuvi tashkil etilib, unda “Ishonch”, “Everest”, “Grifindor” va “Intellekt” jamoalari o‘zaro bilim va tafakkurda bellashdilar. Shuningdek, talabalar o‘zbek va jahon adabiyoti namunalari asosida she’riy bahribayt musobaqasida ishtirok etib, o‘zlarining ifodali o‘qish mahoratlarini namoyon etdilar.

Tadbirning badiiy qismida milliy raqslar ijro etilib, bayramona kayfiyat yaratildi.
Tadbir yakunida “Mushoira” klubining faol a’zolari diplom, tashakkurnoma hamda esdalik sovg‘alari bilan taqdirlandilar.