Termiz davlat pedagogika instituti rektori Xasanov Azizbek Baxtiyarovichning Yangi yil bayrami munosabati bilan bayram tabrigi

 

Muhtaram hamkasblar!
Qadrli talaba-yoshlar!

Sizlarni Yangi – 2026-yil bilan samimiy muborakbod etaman. Shu quvonchli damlarda barchangizga tinchlik-osoyishtalik, sihat-salomatlik, baxt-u saodat tilayman!

Yangi yil – yangi umid, yangi maqsad, yangi ishonch, yangi shijoat demakdir. 2025-yil barchamiz uchun o'qish, o'rganish, rivojlanish yili bo'ldi, desam aslo mubolag'a bo'lmaydi. Har bir sohada, har bir yo'nalishda yangiliklar qilishga, yuksalishga erishdik. O'tgan yillar mobaynida amalga oshirishni orzu qilib yurgan ulkan maqsadlarimizga qadam qo'ydik.

Ishonamanki, kelayotgan barakali yilda maqsadlarimizning natijasini, mevasini ko'ramiz. Mamlakatimiz ravnaq topayotgan, Oliy ta’lim muassasalariga e’tibor kuchayayotgan bir davrda bu taraqqiyotga bizning ham munosib ulushimiz qo'shiladi.

Termiz davlat pedagogika instituti uchun ham kirib kelayotgan yangi yil har doimgidan-da yaxshi yil bo'ladi. Yangi yil xalqimizga, yurtimizga, butun insoniyatga tinchlik, birodarlik, osoyishtalik va baxt-saodat olib kelishini, hayotimizdan, insonligimizdan mamnunlik hissi har birimizda butun umr davom etishini tilayman. Osoyishtalikda, tinchlikda, farovonlikda, shukur bilan bahamjihat yashash barchamizga nasib etsin.

Yana bir bor barchangizni yangi 2026-yil bilan chin qalbimdan tabriklayman! Yangi yilimiz yaxshi yil - barakali yil bo'lsin!

Xasanov Azizbek Baxtiyarovich
Termiz davlat pedagogika instituti rektori