Surxondaryoda olis hududlar uchun xorijiy tillardan onlayn darslar tashkil qilinmoqda

 O‘zbekiston Respublikasi Prezidentining 2022-yil 21-iyundagi PQ–289-sonli qarori hamda Maktabgacha va maktab ta’limi vazirining 2025-yil 19-dekabrdagi 38-sonli bayoni ijrosini ta’minlash maqsadida, Surxondaryo viloyatining olis va chekka hududlaridagi umumta’lim maktablarida xorijiy tillardan onlayn darslar muvaffaqiyatli tashkil etilmoqda.

 Oldin habar berganimizdek, mazkur ishlar doirasida Surxondaryo viloyati Maktabgacha va maktab ta’limi boshqarmasi hamda Termiz davlat pedagogika instituti hamkorligida xorijiy til fanidan mutaxassis yetishmaydigan maktablarga zamonaviy elektron doskalar tarqatilgan edi. Bugungi kunda ushbu doskalar yordamida institut o‘qituvchilari va talabalari tomonidan chekka hududlardagi maktablarda onlayn darslar olib borilmoqda.

  Elektron doskalar o‘quvchilarga masofaviy ta’lim jarayonini yanada samarali tashkil etish, ularga xorijiy tillarni o'rgatish, pedagoglarga esa interaktiv va innovatsion metodlardan foydalanish imkonini beradi. Bu loyiha yuqori malakali xorijiy til o‘qituvchilarini yetishtirish, nazariya hamda amaliyotni uyg‘unlashtirish hamda talabalarni ta’lim jarayoniga faol jalb qilishni ta’minlashga qaratilgan.

 Shu bilan birga, loyiha viloyatimiz ta’lim sifatini oshirish va har bir o‘quvchilarga zamonaviy ta’lim olish imkoniyatini yaratishga xizmat qiluvchi muhim chora-tadbir sifatida amalga oshirilmoqda.