Ijara xonadonlarida yashovchi talabalar sharoitlari o‘rganildi
Ob-havoning keskin sovib ketishi munosabati bilan Maktabgacha va boshlang‘ich ta’lim fakulteti dekani Sh. Qosimov hamda tyutorlar tomonidan ijara xonadonlarida va 3-son Talabalar turar joyida (TTJ) yashovchi talabalarning yashash sharoitlari hamda ijtimoiy-ma’naviy muhiti atroflicha o‘rganildi.
O‘rganish jarayonida xonadonlar va TTJdagi isitish tizimlarining holati ko‘zdan kechirilib, talabalarning kundalik yashash sharoitlari va ehtiyojlari tahlil qilinib, talabalar bilan suhbatlar o‘tkazildi.
Suhbat davomida fakultet dekani Sh. Qosimov tomonidan talabalarga odob-axloq qoidalariga qat’iy rioya etish, yong‘in xavfsizligi talablariga amal qilish, elektr energiyasidan to‘g‘ri va xavfsiz foydalanish, shuningdek, o‘zaro hurmat va mas’uliyat tamoyillariga asoslangan munosabatlarni shakllantirish bo‘yicha muhim tushuntirishlar berildi.
Mazkur tadbir talabalarning xavfsiz va qulay sharoitlarda yashashini ta’minlash, ularning ijtimoiy-ma’naviy muhitini yanada mustahkamlashga xizmat qiladi.