Navbatdagi Maʼnaviyat va maʼrifat kengashi yigʻilishi bo‘lib o‘tdi

Termiz davlat pedagogika institutida yoshlar ma’naviyatini yuksaltirish, sogʻlom hayot tarzini targʻib qilish hamda jinoyat va huquqbuzarliklarning oldini olishga qaratilgan Ma’naviyat va ma’rifat kengashining navbatdagi yigʻilishi bo‘lib o‘tdi. 

Yigʻilish davomida ijtimoiy-ma’naviy muhit barqarorligini ta’minlash, talaba-yoshlar bilan ishlash samaradorligini oshirish, ularning bo‘sh vaqtini mazmunli tashkil etish hamda huquqbuzarliklarning oldini olishga qaratilgan bir qator dolzarb masalalar tanqidiy muhokama qilindi.

 Xususan, fevral oyining “Giyohvandlikka qarshi kurash oyligi” deb e’lon qilingani munosabati bilan talabalar orasida giyohvandlik illatining salbiy oqibatlari haqida tushuntirish ishlarini kuchaytirish, giyohvandlik va narkojinoyatlarni barvaqt oldini olish bo‘yicha tizimli targ‘ibot tadbirlarini tashkil etish masalalari muhokama qilindi. Bu borada huquqni muhofaza qiluvchi organlar va soha mutaxassislari bilan hamkorlikda uchrashuvlar, davra suhbatlari o‘tkazish zarurligi ta’kidlandi.

 Shuningdek, talabalar o‘rtasida sog‘lom raqobat va jismoniy faollikni oshirish maqsadida Talabalar ligasi sport musobaqalarining institut bosqichini yuqori saviyada tashkil etish, sport tadbirlarini adolatli va shaffof tarzda o‘tkazish hamda iqtidorli yoshlarni saralab olish masalalariga alohida e’tibor qaratildi.

 Yig‘ilishda ijara xonadonlari hamda Talabalar turar joyida istiqomat qilayotgan talabalar holidan muntazam xabar olish, ularning yashash sharoitlarini o‘rganish, ayniqsa kuz-qish mavsumida isitish moslamalaridan to‘g‘ri va xavfsiz foydalanish bo‘yicha profilaktik tushuntirish ishlarini kuchaytirish zarurligi qayd etildi.