Termiz davlat pedagogika institutida yangi 400 o‘rinli talabalar turar joyi foydalanishga topshirildi

Bugun Termiz davlat pedagogika institutida barcha zamonaviy qulayliklarga ega yangi talabalar turar joyi tantanali ravishda foydalanishga topshirildi. Termiz tumanida barpo etilayotgan "Yangi O‘zbekiston" massivi hududida qad rostlagan mazkur 5 qavatli bino 400 o‘ringa mo‘ljallangan talabalar turar joyida tikuvchilik xonasi, ma’naviyat xonasi, kutubxona, fitnes zali va boshqa xizmat xonalari tashkil etilgan.

Ochilish marosimida Surxondaryo viloyati hokimi Ulug‘bek Qosimov ishtirok etib, talabalarni ushbu quvonchli voqea bilan tabrikladi. Viloyat rahbari yoshlarga yaratilgan imkoniyatlardan samarali foydalanib, bilim va kasb-hunarlarni chuqur egallash, kelajakda yurtimiz taraqqiyotiga munosib hissa qo‘shish zarurligini ta’kidladi.

Shundan so‘ng viloyat hokimi tadbir ishtirokchilari bilan birgalikda talabalar turar joyida yaratilgan shart-sharoitlar bilan yaqindan tanishdi. Jami 107 ta xonadan iborat yotoqxonaning har biri televizor, Wi-Fi tarmog‘i, o‘qish uchun qulay sharoitlar va boshqa zarur jihozlar bilan ta’minlangan.

Shuningdek, payshanba — "Yoshlar kuni" munosabati bilan talaba-yoshlar bilan muloqot o‘tkazilib, ularning taklif va tashabbuslari hamda murojaatlari tinglandi. Yoshlar tomonidan bildirilgan masalalarni hal etish va tashabbuslarni qo‘llab-quvvatlash yuzasidan mutasaddilarga tegishli vazifalar yuklatildi.

Ma’lumot uchun, Termiz davlat pedagogika institutida 10,8 ming nafar talaba tahsil olayotgan bo‘lib, shundan 6,6 ming nafari kunduzgi ta’lim shaklida o‘qiydi. Talabalarni turar joy bilan ta’minlash maqsadida bunga qadar 892 o‘rinli 3 ta talabalar turar joyi foydalanishga topshirilgan.