Ochilish marosimi

Bugun Maktabgacha va maktab ta’limi vazirligi tizimidagi Termiz davlat pedagogika institutining yangi o‘quv binosi ochilish marosimi bo‘lib o‘tdi.

Unda Maktabgacha va maktab ta’limi vaziri E’zoza Karimova, Surxondaryo viloyati hokimi Ulug‘bek Qosimov, vazirlik hamda mahalliy hokimlik mas’ullari, pedagoglar, talabalar hamda keng jamoatchilik vakillari ishtirok etdi.

Mazkur yangi o‘quv binosi Termiz tumanida qad rostlayotgan Yangi O‘zbekiston massivi hududida joylashgan bo‘lib, o‘zida zamonaviy arxitektura loyihalarining barcha namunalarini mujassam etgan. 

Umumiy hisobda 1500 o‘quv o‘rniga ega ta’lim dargohida talabalarning sifatli tahsil olishlari hamda bo‘sh vaqtlarini mazmunli o‘tkazishlari uchun barcha shart-sharoitlar yaratilgan. 

Xususan, o‘quv va laboratoriya xonalari, kutubxona, oshxona, yotoqxona hamda turli jihozlar bilan ta’minlangan sport mashg‘ulotlari xonasi mavjud.

Vazir tadbir davomida o‘qituvchilar va talabalar bilan muloqot qildi hamda bo‘lajak pedagoglarni tayyorlash hamda ularning bilim va malakasini doimiy oshirib borish bo‘yicha fikr almashdi.