Oq-tepada bioxilma-xillik bo‘yicha amaliy mashg‘ulot

Termiz davlat pedagogika institutida talabalar ekologik tashabbuslari doirasida Geografiya va iqtisodiy bilim asoslari yo‘nalishi talabalari uchun Oq-tepa suv omborida o‘quv-amaliy mashg‘ulot tashkil etildi. Tadbir talabalarni tabiiy muhitni kuzatish, bioxilma-xillikni o‘rganish va suv ombori atrofidagi ekotizimlarning ahamiyatini tushunishga yo‘naltirdi.

Mashg‘ulot davomida talabalar Oq-tepa suv omborining tabiiy xususiyatlari, hududning flora va faunasi, suv obyektining xo‘jalikdagi o‘rni hamda tabiiy muhitni muhofaza qilish masalalari bo‘yicha ma’lumotlarga ega bo‘ldilar. O‘quv dala amaliyoti jarayonida mutaxassis va professor-o‘qituvchilar tomonidan berilgan tushuntirishlar talabalarda tabiatni kuzatish, ekologik tahlil va mas’uliyatli munosabat ko‘nikmalarini rivojlantirishga xizmat qildi.

Mazkur faoliyat bioxilma-xillikni asrash, suv resurslari va tabiiy hududlarga nisbatan ehtiyotkor munosabatni shakllantirish hamda talabalar ekologik savodxonligini oshirish nuqtai nazaridan muhim amaliy tashabbus bo‘ldi.