“Kelajakka qadam” – bitiruvchilar bandligini ta’minlashda yangi bosqich

Termiz davlat pedagogika institutida bitiruvchi talabalar hamda professor-o‘qituvchilar ishtirokida ochiq muloqot tashkil etildi. Mazkur tadbir bitiruvchilar bandligini ta’minlash, ularni qo‘llab-quvvatlash va mehnat bozoriga samarali yo‘naltirish maqsadida o‘tkazildi.

Tadbirda institutning o‘quv ishlari bo‘yicha prorektori L.Bozorov, “O‘zmilliybank” AJ Surxondaryo viloyati boshqarmasi boshlig‘i B.Mamarajabov hamda bank mutaxassislari ishtirok etib, “Kelajakka qadam” loyihasi doirasida bitiruvchilar uchun yaratilayotgan keng imkoniyatlar haqida batafsil ma’lumot berdilar.

Uchrashuv davomida bitiruvchilarni ish bilan ta’minlash, ularning kasbiy faoliyatini boshlashida ko‘maklashish, shuningdek, imtiyozli bank xizmatlari va moliyaviy qo‘llab-quvvatlash mexanizmlari muhokama qilindi. Bitiruvchilar tomonidan bildirilgan savol va muammolar yuzasidan amaliy tavsiyalar berilib, ularning yechimi bo‘yicha zarur choralar belgilandi.

Mazkur ochiq muloqot yosh mutaxassislarning bandligini ta’minlash, ularning ijtimoiy-iqtisodiy faolligini oshirish hamda kelajakdagi muvaffaqiyatli faoliyati uchun muhim platforma bo‘lib xizmat qiladi.