Jahon adabiyotida tabiat va ekologik tafakkur

Atrof-muhitni muhofaza qilish ta’limi doirasida ochiq dars tashkil etildi

2024-yil mart oyida Termiz davlat pedagogika instituti Tillar fakultetida atrof-muhitni muhofaza qilish ta’limi va ekologik savodxonlikni ta’lim jarayoniga integratsiya qilish doirasida “Jahon adabiyotida tabiat va ekologik tafakkur” mavzusida ochiq dars mashg‘uloti o‘tkazildi. Mashg‘ulotni O‘zbek tili va adabiyoti kafedrasi dotsenti Saidmuradova Saxiba Jalmuradovna olib bordi.

Ochiq darsda Tillar fakultetining tegishli ta’lim yo‘nalishlaridan 2–3 akademik guruhdan jami 40 nafardan ortiq talaba hamda kafedra professor-o‘qituvchilari ishtirok etdi. Mashg‘ulot 1 akademik juftlik (80 daqiqa) davomida tashkil etildi.

Dars jarayonida jahon adabiyoti namunalarida tabiat tasviri, inson va atrof-muhit o‘rtasidagi o‘zaro bog‘liqlik, ekologik ong va barqaror hayot tarzi g‘oyalari tizimli ravishda tahlil qilindi. Xususan, Yevropa adabiy oqimlari misolida tabiatning estetik qiymati bilan bir qatorda uning ekologik, ijtimoiy va tarbiyaviy ahamiyati, insonning muhit oldidagi mas’uliyati hamda tabiiy resurslardan oqilona foydalanish tamoyillari muhokama qilindi.

Mashg‘ulot davomida talabalar adabiy matnlarni ekologik yondashuv asosida tahlil qilish, tabiat obrazlari orqali ekologik muammolarni anglash hamda atrof-muhitni muhofaza qilishga oid qarashlarni shakllantirish bo‘yicha amaliy ko‘nikmalarni rivojlantirdilar. Dars interaktiv metodlar — savol-javob, matn tahlili va guruh muhokamalari asosida olib borildi.

Mazkur ochiq dars institutda ekologik ta’limni faqat tabiiy fanlar bilan cheklamasdan, uni gumanitar yo‘nalishlar orqali ham rivojlantirish amaliyotining bir qismi hisoblanadi. Ushbu yondashuv talabalarda ekologik savodxonlik, tanqidiy fikrlash va atrof-muhitga mas’uliyatli munosabatni shakllantirishga xizmat qiladi hamda institutda uzluksiz va tizimli ravishda davom ettiriladi.