Xalqaro professor-o‘qituvchilar ishtirokida inklyuziv ta’lim bo‘yicha darslar tashkil etildi

Termiz davlat pedagogika institutiga Abay nomidagi Qozog‘iston milliy pedagogika universitetidan 5 nafar professor-o‘qituvchi tashrif buyurib, talabalarga xalqaro akademik hamkorlik asosida ma’ruza va seminar mashg‘ulotlarini olib borish jarayoni yo‘lga qo‘yildi.

Mazkur tashrif doirasida ular “Boshlang‘ich ta’lim” hamda “O‘zga tilli guruhlarda rus tili” yo‘nalishlari talabalari uchun “Inklyuziv ta’lim”, “Inklyuziv ta’lim. Gospital pedagogika”, “Tarbiyaviy ishlar metodikasi” va “Hozirgi tilshunoslik tamoyillari va usullari” fanlaridan dars mashg‘ulotlarini olib boradilar. Ushbu mashg‘ulotlar talabalarning inklyuziv ta’limga oid nazariy bilimlari va amaliy yondashuvlarini kuchaytirish, turli ehtiyojga ega o‘quvchilar bilan ishlash kompetensiyalarini rivojlantirish hamda zamonaviy pedagogik metodlar bilan tanishtirishga xizmat qiladi.

Xususan, inklyuziv ta’lim va gospital pedagogika bo‘yicha xalqaro professor-o‘qituvchilar tomonidan olib borilayotgan mashg‘ulotlar teng ta’lim imkoniyatlari, moslashtirilgan pedagogik yondashuvlar va qo‘llab-quvvatlovchi ta’lim muhiti bo‘yicha talabalarning kasbiy tayyorgarligini mustahkamlaydi. Shu jihatdan, ushbu faoliyat institutning inklyuziv ta’lim, teng ishtirok va xalqaro hamkorlik asosida pedagogik salohiyatni rivojlantirishga qaratilgan institutsional yondashuvining muhim qismi hisoblanadi.