TerDPIda almashinuv

Termiz davlat pedagogika institutida xalqaro akademik hamkorlik doirasida talabalar almashinuvi dasturi amaliy bosqichda davom etmoqda. Joriy yilning fevral oyida institutning 5 nafar talabasining Shadrinsk davlat pedagogika universitetiga yuborilgani ortidan, hamkor oliygohning 3 nafar talabasi Termiz davlat pedagogika institutida ta’lim olish uchun qabul qilindi.

Talabalar almashinuvi dasturining navbatdagi bosqichi sifatida O‘quv ishlari bo‘yicha prorektor P. Tojiyev, Boshlang‘ich ta’lim fakulteti dekani X. Norbo‘tayev, Xalqaro bo‘lim boshlig‘i U. Eshmuratov hamda kafedra mudirlari xorijlik talabalar bilan uchrashuv o‘tkazdi. Uchrashuv davomida institutdagi o‘quv jarayonlari, ta’lim muhiti, yaratilgan akademik imkoniyatlar hamda talabalar turar joyidagi sharoitlar haqida batafsil ma’lumot berildi.

Mazkur tashabbus Termiz davlat pedagogika institutida akademik mobillikni ikki tomonlama shaklda yo‘lga qo‘yish, hamkor oliy ta’lim muassasalari bilan real ta’lim almashinuvi mexanizmlarini mustahkamlash va xorijiy talabalar uchun amaliy o‘quv muhitini yaratish borasidagi muhim natijalardan biridir.