Shensi delegatsiyasi
2024-yil 21-may kuni Termiz davlat pedagogika institutiga Xitoy Xalq Respublikasining Siyan shahrida joylashgan Shensi pedagogika universiteti Tarix fakulteti professor-o‘qituvchilari, talabalar va tadqiqotchilaridan iborat delegatsiya tashrif buyurdi. Tashrif doirasida professor Li Si boshchiligidagi delegatsiya a’zolari bilan institut prorektorlari, tegishli bo‘lim boshliqlari hamda Tarix va uni o‘qitish metodikasi kafedrasi mudiri o‘rtasida uchrashuv tashkil etildi.
Uchrashuv davomida ikki oliy ta’lim muassasasi o‘rtasida hamkorlik aloqalarini yo‘lga qo‘yish, tarix yo‘nalishidagi ilmiy muloqotni kuchaytirish va qo‘shma akademik tashabbuslarni rivojlantirish masalalari muhokama qilindi. Xususan, “Ipak yo‘li”, “Osiyo tarixi” va “Sug‘diyona madaniyati” kabi mavzulardagi tadqiqotlarning ilmiy samaradorligi, mazkur yo‘nalishlarda tajriba almashish va kelgusidagi hamkorlik imkoniyatlari yuzasidan fikr almashildi.
Shuningdek, uchrashuv davomida professor Xe Chjilun Shensi universiteti haqida ma’lumot berib, talabalar uchun yaratilgan sharoitlar, ta’lim tizimi va akademik muhit xususiyatlari haqida taqdimot qildi. Mazkur tashrif Termiz davlat pedagogika institutining xalqaro ilmiy-akademik aloqalarni kengaytirish, tarix yo‘nalishidagi tadqiqotlar bo‘yicha hamkorlikni rivojlantirish va xorijiy universitetlar bilan bilim almashinuvi platformalarini mustahkamlash borasidagi amaliy faoliyatini aks ettiradi.