Pinnacle delegatsiyasi

2024-yil 2-dekabr kuni Termiz davlat pedagogika institutiga “PINACLE TEACHING SOLUTION” ta’lim tashkiloti delegatsiyasi tashrif buyurdi. Delegatsiya tarkibida tashkilotning O‘zbekistondagi direktori Don Vestal hamda Kanadadagi o‘quv ishlari bo‘yicha direktori Dave Lindsey ishtirok etdi. Tashrif doirasida institut rektori A. Xasanov, Xalqaro hamkorlik bo‘limi rahbari U. Eshmuratov va Amaliy ingliz tili kafedrasi mudiri N. Madalov bilan uchrashuv o‘tkazildi.

Uchrashuv davomida talabalar almashinuvi, xorijlik malakali mutaxassislarni institutga jalb etish, ingliz tili ta’limini kuchaytirish hamda xalqaro hamkorlikni amaliy bosqichga olib chiqish masalalari muhokama qilindi. Muzokaralar jarayonida institutda xalqaro ta’lim muhitini rivojlantirish, xorijiy ekspertlar ishtirokidagi o‘quv faoliyatini kengaytirish va kelgusidagi ta’limiy tashriflar uchun tashkiliy asos yaratish yuzasidan fikr almashildi.

Uchrashuv yakunida 2025-yil may oyida Amerika Qo‘shma Shtatlaridan bir guruh talabaning Termiz davlat pedagogika institutiga tashrif buyurishiga kelishib olindi. Mazkur tashrif institutning yangi xalqaro hamkorlarni jalb etish, talabalar almashinuvi uchun amaliy kanallar yaratish va kelgusidagi akademik hamkorlikni real bosqichga olib chiqish borasidagi tizimli faoliyatini aks ettiradi.