Abay professorlari darslari
Termiz davlat pedagogika institutida xalqaro akademik hamkorlik doirasida Abay nomidagi Qozog‘iston milliy pedagogika universitetining 5 nafar professor-o‘qituvchisi ishtirokida ta’lim jarayonlari tashkil etildi. Tashrif doirasida xorijiy professor-o‘qituvchilar bir oy davomida “Boshlang‘ich ta’lim” hamda “O‘zga tilli guruhlarda rus tili” yo‘nalishi talabalari uchun “Inklyuziv ta’lim”, “Inklyuziv ta’lim. Gospital pedagogika”, “Tarbiyaviy ishlar metodikasi” va “Hozirgi tilshunoslik tamoyillari va usullari” fanlaridan ma’ruza hamda seminar mashg‘ulotlari olib bordi.
Mazkur darslar talabalarning xalqaro akademik tajriba bilan bevosita tanishishi, zamonaviy pedagogik va lingvistik yondashuvlarni o‘rganishi, xorijiy professorlar ishtirokida ta’lim olish imkoniyatlarini kengaytirishi bilan ahamiyatlidir. Bir oylik o‘quv jarayoni davomida bilim almashinuvi, metodik tajriba ulashish va ta’lim mazmunini boyitishga xizmat qiluvchi real akademik hamkorlik muhiti shakllandi.
Ushbu tashabbus Termiz davlat pedagogika institutining hamkor oliy ta’lim muassasalari bilan amaliy akademik aloqalarni rivojlantirish, xorijiy professorlarni o‘quv jarayoniga jalb etish va xalqaro ta’lim komponentlarini institut amaliyotiga integratsiya qilish borasidagi tizimli faoliyatini aks ettiradi. Ma’lumotga ko‘ra, mazkur mashg‘ulotlar 2024-yil 19-martga qadar davom etadi.