Work and Travel

2024-yil 14-dekabr kuni Termiz davlat pedagogika institutiga Germaniyaning M&T Personalvermittlung, Fenix Jobagentur UG va Everest Vermittlung Group firmalari vakillari tashrif buyurdi. Tashrif doirasida O‘quv ishlari bo‘yicha prorektor L. Bozorov hamda Xalqaro hamkorlik bo‘limi boshlig‘i U. Eshmuratov ishtirokida uchrashuv o‘tkazilib, talabalarning Germaniyada xalqaro ta’lim va kasbiy tajriba orttirish imkoniyatlari muhokama qilindi.

Muloqot davomida tomonlar talabalar uchun Work and Travel (yozgi ta’til davrida ishlash va sayohat), Ausbildung (dual ta’lim), Weiterbildung (1 yillik malakaviy o‘qish) hamda 3–6 oylik amaliyot dasturlarini tashkil etish istiqbollari yuzasidan fikr almashdilar. Ushbu yo‘nalishlar talabalarning xalqaro mehnat va ta’lim muhitiga integratsiyalashuvi, kasbiy ko‘nikmalarini rivojlantirishi, xorijiy til amaliyotini mustahkamlashi va kelgusidagi bandlik imkoniyatlarini kengaytirishi nuqtai nazaridan muhim ahamiyat kasb etadi.

Shuningdek, delegatsiya vakillari nemis tili yo‘nalishi talabalari bilan ochiq suhbat o‘tkazib, Germaniyada qisqa muddatli ish bilan ta’minlanish, amaliyot dasturlarida ishtirok etish shartlari va shu kungacha erishilgan natijalar haqida ma’lumot berdilar. Mazkur tashrif Termiz davlat pedagogika institutining talabalar uchun xalqaro kasbiy-ta’limiy imkoniyatlarni kengaytirish, tashqi hamkor tashkilotlar bilan amaliy aloqalarni rivojlantirish va kelgusidagi mobility hamda employability yo‘nalishlarini shakllantirish borasidagi tizimli faoliyatini aks ettiradi.