Qozon hamkorligi
2024-yil 30-may kuni Termiz davlat pedagogika instituti rektori A. Xasanov boshchiligidagi delegatsiya Rossiya Federatsiyasida Qozon Federal universiteti tashkil etilganining 220 yilligi munosabati bilan o‘tkazilgan X xalqaro forumda ishtirok etdi. Tashrif doirasida delegatsiya Qozon Federal universiteti tarkibidagi Elabuga instituti direktori Yelena Efimovna Merzon bilan rasmiy uchrashuv o‘tkazdi.
Uchrashuvda tomonlar o‘rtasida hamkorlik aloqalarini tizimli ravishda rivojlantirish, magistratura bosqichida Rus tili va adabiyoti yo‘nalishi bo‘yicha 1+1 shaklidagi qo‘shma ta’lim dasturini joriy etish istiqbollari hamda akademik hamkorlikning tashkiliy mexanizmlari muhokama qilindi. Shuningdek, delegatsiya Psixologiya instituti direktori Aydar Minimansurovich bilan uchrashib, ikki oliy ta’lim muassasasi o‘rtasida ilmiy hamkorlikni kengaytirish, qo‘shma ilmiy jurnal tashkil etish va maqolalar chop etish bo‘yicha kelgusidagi hamkorlik yo‘nalishlarini ko‘rib chiqdi.
Mazkur tashrif Termiz davlat pedagogika institutining xalqaro akademik aloqalarni mustahkamlash, qo‘shma ta’lim formatlarini rivojlantirish va ilmiy nashrlar bo‘yicha institutsional sheriklikni kengaytirishga qaratilgan amaliy faoliyatini aks ettiradi. Forum va uchrashuvlar natijasida ta’lim va ilmiy yo‘nalishlarda keyingi hamkorlik bosqichlari uchun institutsional muloqot shakllantirildi.