Zo‘ravonlikka qarshi 16 kun
Termiz davlat pedagogika institutida 25-noyabr — Xalqaro ayollarga nisbatan zo‘ravonlikka qarshi kurashish kuni hamda 25-noyabrdan 10-dekabrgacha davom etadigan “Zo‘ravonlikka qarshi 16 kun” kampaniyasi doirasida “Biz zo‘ravonlikka qarshimiz” va “Zo‘ravonliksiz oila — farovon hayot sari 16 kun” mavzularida davra suhbati tashkil etildi. Tadbir institut Xotin-qizlar maslahat kengashi tomonidan o‘tkazildi.
Davra suhbatiga Termiz tuman IIB Voyaga yetmaganlar va yoshlar bilan ishlash guruhi katta leytenanti A.Ahmedova, Termiz tuman xotin-qizlar masalalari bo‘yicha katta inspektor S.Muhammadiyeva, Ijtimoiy himoya inson markazi psixologi M.Abdulazizova, tuman otinoyisi G.Xolmurodova, “Oqila ayollar” harakati a’zosi Z.Yo‘qubova hamda mahalla xotin-qizlar faollari taklif etildi. Uchrashuv davomida tazyiq va zo‘ravonlik holatlarining oldini olish, ayollar huquqlarini himoya qilish, yoshlar o‘rtasida huquqiy madaniyatni oshirish, xavfsiz ijtimoiy muhitni qo‘llab-quvvatlash va murojaat qilish zarur bo‘lgan holatlarda yordam mexanizmlarining ahamiyati yuzasidan tushuntirishlar berildi. Mavzuga oid videorolik namoyish etilishi tadbirning profilaktik va ma’rifiy ta’sirini kuchaytirdi.
Mazkur tadbir institutda xotin-qizlar huquqiy himoyasi, zo‘ravonlikning oldini olish, psixologik farovonlik va gender sezgir yondashuvni mustahkamlashga qaratilgan amaliy institutsional tashabbus sifatida baholanadi. Shu jihatdan, u talaba-yoshlar, ayniqsa xotin-qizlar uchun xavfsiz, hurmatga asoslangan va qo‘llab-quvvatlovchi ta’lim muhitini shakllantirishga xizmat qiladi.