SUN’IY INTELLEKT SAVODXONLIGI BO‘YICHA QISQA MUDDATLI O‘QUV KURSLARI TASHKIL ETILDI

Termiz davlat pedagogika institutining Tabiiy va aniq fanlar fakulteti Matematika va informatika kafedrasi hamda Texnologiya va geografiya kafedrasi professor-o‘qituvchilari tashabbusi bilan “Sun’iy intellekt savodxonligi” mavzusida qisqa muddatli o‘quv kurslari tashkil etildi.

Mazkur o‘quv kurslari zamonaviy ta’lim jarayonida sun’iy intellekt texnologiyalaridan samarali foydalanish ko‘nikmalarini shakllantirish, talaba-yoshlar va professor-o‘qituvchilarning raqamli kompetensiyalarini oshirishga qaratilgan.

Kurslar davomida ishtirokchilarga sun’iy intellektning oliy ta’lim tizimidagi imkoniyatlari, chat-botlardan samarali foydalanish, shuningdek, to‘g‘ri va samarali prompt (buyruq) berish bo‘yicha nazariy hamda amaliy mashg‘ulotlar o‘tkazilmoqda.

Qisqa muddatli o‘quv kurslari hafta davomida tajribali professor-o‘qituvchilar M.Alimov hamda R.To‘rayev tomonidan olib borilmoqda.

Mazkur tashabbus ta’lim jarayoniga innovatsion yondashuvlarni joriy etish, yoshlarning zamonaviy texnologiyalarga bo‘lgan qiziqishini oshirish hamda ularni kelajak kasblariga tayyorlashda muhim ahamiyat kasb etadi.