MAGISTRATURA BITIRUVCHI TALABALARI BILAN MUHIM UCHRASHUV O‘TKAZILDI

2026-yil 14-aprel kuni Termiz davlat pedagogika institutida magistratura mutaxassisliklarining 2-kurs bitiruvchi talabalari ishtirokida muhim uchrashuv tashkil etildi.

Mazkur uchrashuvda institut rahbariyati hamda bitiruvchi magistrlar ishtirok etib, ta’lim jarayoniga oid dolzarb masalalar muhokama qilindi.

Uchrashuv davomida O‘quv-uslubiy boshqarma boshlig‘i R. Omonov tomonidan magistratura bo‘limining yangi boshlig‘i — Sattorov Sardor Abdimuradovich jamoaga tanishtirildi. Yangi rahbarning kelgusidagi faoliyati, ustuvor vazifalari hamda magistratura ta’lim sifatini oshirishga qaratilgan rejalari haqida ma’lumot berildi.

Shuningdek, yig‘ilishda bitiruvchi magistrlarning dissertatsiya ishlari, ilmiy-tadqiqot faoliyati, o‘quv jarayonidagi ishtiroki hamda himoya bosqichlariga tayyorgarlik masalalari batafsil ko‘rib chiqildi. Har bir yo‘nalish kesimida mavjud muammolar tahlil qilinib, ularni bartaraf etish bo‘yicha aniq tavsiyalar berildi.

Uchrashuv doirasida talabalar amaliyot bo‘limi tomonidan bitiruvchi yoshlar uchun yaratilayotgan yangi imkoniyatlar, xususan imtiyozli kreditlar ajratilishi rejalari haqida ham ma’lumot berilib, ularning shartlari va afzalliklari yuzasidan batafsil tushuntirishlar berildi.

Mazkur uchrashuv bitiruvchi magistrlar uchun muhim ahamiyat kasb etib, ularning kelgusi faoliyatiga oid aniq yo‘nalish belgilab olish, mavjud savollariga javob topish hamda ta’lim sifatini yanada oshirishga xizmat qildi.