SPORT MUSOBAQALARINING OCHILISH MAROSIMI BO‘LIB O‘TDI

Termiz davlat pedagogika institutida sog‘lom turmush tarzini keng targ‘ib qilish hamda jismoniy faollikni oshirish maqsadida haftaning seshanba kuni “Sport kuni” doirasida professor-o‘qituvchilar hamda ishchi-xodimlar o‘rtasida sport musobaqalarining ochilish marosimi bo‘lib o‘tdi.

Mazkur tadbir yurtimizda jismoniy tarbiya va sport sohasini rivojlantirish, aholini, ayniqsa, yoshlarni ommaviy sportga keng jalb etish borasida olib borilayotgan islohotlarning amaliy ifodasi sifatida tashkil etildi.

Ochilish marosimida so‘zga chiqqan mas’ullar sportning inson salomatligi, intizomi va jamoaviylikni mustahkamlashdagi o‘rni haqida alohida to‘xtalib, barchani sog‘lom turmush tarziga amal qilishga chaqirdilar.

Shundan so‘ng musobaqalarga start berildi. Unda erkaklar o‘rtasida mini futbol hamda ayollar o‘rtasida voleybol sport turlari bo‘yicha qizg‘in va murosasiz bahslar boshlandi.

Mazkur sport tadbiri professor-o‘qituvchilar va ishchi-xodimlar o‘rtasida do‘stona munosabatlarni mustahkamlash, jamoaviylik ruhini oshirish hamda sog‘lom raqobat muhitini shakllantirishga xizmat qilmoqda.

Bunday sport tadbirlarining muntazam tashkil etilishi institut jamoasining jismoniy faolligini oshirish bilan birga, sog‘lom turmush tarzini keng targ‘ib etishda muhim ahamiyat kasb etadi.