Kiberxavfsizlik va huquqbuzarliklar profilaktikasi — dolzarb masala

Termiz davlat pedagogika instituti talaba-yoshlar ishtirokida “Kiber madaniyatni yuksaltirish” hamda jinoyatchilik va huquqbuzarliklarning oldini olishga bag‘ishlangan profilaktik targ‘ibot tadbiri tashkil etildi.

Tadbir davomida mutaxassislar tomonidan kibermadaniyat tushunchasi keng yoritilib, uning mazmun-mohiyati — internet muhitida axloqiy me’yorlar, huquqiy qoidalar va xavfsizlik talablariga rioya qilgan holda ongli faoliyat yuritishdan iborat ekani ta’kidlandi. Shuningdek, ijtimoiy tarmoqlar orqali sodir etilayotgan firibgarlik, ma’lumot o‘g‘riligi kabi jinoyatlar hamda ularning oldini olish choralariga alohida e’tibor qaratildi.

Talabalarga onlayn xavfsizlik qoidalariga amal qilish, shaxsiy ma’lumotlarni himoya qilish, kiberjinoyatlarga qarshi ehtiyot choralarini ko‘rish yuzasidan amaliy tavsiyalar berildi. Shu bilan birga, jinoyatchilik va huquqbuzarlik sodir etishning huquqiy oqibatlari haqida batafsil tushuntirishlar olib borildi.

Tadbir doirasida Surxondaryo viloyati Ichki ishlar boshqarmasining Axborot texnologiyalari sohasidagi jinoyatlarga qarshi kurashish bo‘limi tomonidan ishlab chiqilgan “APK-qo‘riqchi” dasturi talabalarning mobil qurilmalariga o‘rnatilib, uning imkoniyatlari haqida ma’lumot berildi. Mazkur dastur orqali mobil telefonlarni zararli dasturlardan himoyalash mumkinligi alohida ta’kidlandi.

Tadbirdan ko‘zlangan asosiy maqsad — talaba-yoshlar o‘rtasida jinoyatchilik va huquqbuzarliklarning oldini olish, ularning salbiy oqibatlari haqida tushuncha berish, shuningdek, kiberxavfsizlik bo‘yicha bilim va ko‘nikmalarni mustahkamlash hamda axborot madaniyatini yuksaltirishdan iborat.

Termiz davlat pedagogika instituti jamoasi yoshlar o‘rtasida kiberxavfsizlikni ta’minlash va huquqbuzarliklarning oldini olish borasidagi tizimli ishlarni izchil davom ettiradi.