Ochiq dars

TerDPI da navbatdagi "Ochiq dars" mashg'uloti yuqori saviyada tashkil etildi

Termiz davlat pedagogika institutida professor-o‘qituvchilar o‘rtasida o‘tkazilayotgan “Oliy ta’lim muassasasining eng yaxshi pedagogi” tanlovining institut bosqichi doirasida navbatdagi ochiq dars mashg‘uloti yuqori saviyada tashkil etildi. Mazkur tanlov pedagoglarning kasbiy mahoratini oshirish, zamonaviy pedagogik texnologiyalarni ta’lim jarayoniga keng joriy etish hamda ilg‘or tajribalarni ommalashtirishga xizmat qilmoqda.

Tanlov doirasida Oʻzbek tili va adabiyoti kafedrasi mudiri Lobar Mardonova tomonidan “Adabiy ta’limda innovatsion yondashuv” fanidan “Virtual ta’limning adabiyot o‘qitishdagi ahamiyati” mavzusida ochiq dars mashg‘uloti o‘tkazildi. Dars mashg‘ulotida kafedra professor-o‘qituvchilari, yosh tadqiqotchilar hamda talaba-yoshlar faol ishtirok etdilar.

Ochiq dars davomida bugungi raqamli ta’lim muhitida virtual texnologiyalarning adabiyot fanini o‘qitishdagi o‘rni va ahamiyati keng yoritildi. Jumladan, elektron platformalar, multimedia vositalari, onlayn ta’lim resurslari va interaktiv metodlarning talabalarning bilim olish jarayonidagi samaradorligi haqida batafsil ma’lumot berildi. Shuningdek, virtual ta’lim vositalari orqali badiiy asarlarni tahlil qilish, obrazlar olamini chuqur anglash va mustaqil ijodiy fikrlash ko‘nikmalarini rivojlantirish imkoniyatlari amaliy misollar asosida tushuntirildi.

Mashg‘ulot jarayonida zamonaviy pedagogik yondashuvlar asosida turli interaktiv metodlardan samarali foydalanildi. Talabalar kichik guruhlarda ishlash, taqdimotlar tayyorlash, elektron platformalar orqali fikr almashish hamda virtual muhitda adabiy tahlillar olib borish jarayonlarida faol qatnashdilar. Bu esa darsning qiziqarli va mazmunli tashkil etilishiga xizmat qildi.

Ochiq dars yakunida ishtirokchilar tomonidan mashg‘ulotning ilmiy-metodik jihatdan puxta tayyorlangani, innovatsion yondashuvlarga boyligi hamda bugungi ta’lim tizimi talablariga to‘liq mos kelishi alohida e’tirof etildi. Ayniqsa, virtual ta’limning adabiyot fanini o‘qitishdagi samaradorligini oshirishga qaratilgan amaliy tavsiyalar professor-o‘qituvchilarda katta qiziqish uyg‘otdi.

Mazkur ochiq dars ta’lim sifatini oshirish, innovatsion pedagogik tajribalarni ommalashtirish va professor-o‘qituvchilarning kasbiy kompetensiyalarini rivojlantirish borasida muhim ahamiyat kasb etdi.