Chiqindilarni saralash va 3R tamoyillari bo‘yicha seminar-trening tashkil etildi
Termiz davlat pedagogika institutida talabalar, tyutorlar va mas’ul xodimlar ishtirokida chiqindilarni saralash, qayta foydalanish va mas’uliyatli iste’mol madaniyatini shakllantirishga qaratilgan seminar-trening tashkil etildi.
Seminarda kampus hududida hosil bo‘ladigan chiqindilarni to‘g‘ri ajratish, organik va noorganik chiqindilarni alohida yig‘ish, qog‘oz, plastik, shisha va metall chiqindilarni saralash, shuningdek, chiqindilarni umumiy axlat oqimiga aralashtirmaslik bo‘yicha amaliy tushuntirishlar berildi.
Tadbir davomida 3R tamoyillari — Reduce, Reuse, Recycle, ya’ni kamaytirish, qayta foydalanish va qayta ishlashga yo‘naltirish mazmuni talabalarga tushuntirildi. Talabalarga ortiqcha chiqindi hosil qilmaslik, foydalanishga yaroqli buyumlarni qayta ishlatish, qog‘oz va plastik sarfini kamaytirish hamda kampusdagi chiqindi qutilaridan to‘g‘ri foydalanish bo‘yicha tavsiyalar berildi.
Mazkur seminar institutda amalga oshirilayotgan chiqindilarni boshqarish tizimining muhim tarkibiy qismi bo‘lib, talabalarning ekologik mas’uliyatini oshirish, kampus tozaligini ta’minlash va barqaror rivojlanish tamoyillarini kundalik hayotga tatbiq etishga xizmat qiladi.