TerDPI talabasi Osiyo chempioni bo‘ldi!
Termiz davlat pedagogika instituti Jismoniy madaniyat va san’at fakulteti, Jismoniy madaniyat ta’limi yo‘nalishi 2-bosqich talabasi Abdullayeva Charos Tojikiston Respublikasining Dushanbe shahrida bo‘lib o‘tgan kattalar o‘rtasidagi XV Osiyo chempionatida muvaffaqiyatli ishtirok etib, yuksak natijaga erishdi.
O‘zbekiston terma jamoasi safida musobaqada qatnashgan sportchimiz ayollar o‘rtasidagi 87 kilogramm vazn toifasida barcha raqibalarini mag‘lub etib, faxrli 1-o‘rinni qo‘lga kiritdi hamda Osiyo chempionati oltin medaliga sazovor bo‘ldi.
Ushbu yorqin g‘alaba nafaqat sportchimizning mehnati va matonati, balki Termiz davlat pedagogika instituti hamda mamlakatimiz sporti uchun ham munosib yutuq bo‘ldi.
Abdullayeva Charosni ushbu ulkan muvaffaqiyat bilan samimiy muborakbod etamiz va kelgusidagi xalqaro musobaqalarda ham yurtimiz sharafini munosib himoya qilishiga ishonamiz.