Termiz davlat pedagogika institutida “Qo‘shma ta’lim” dasturining ilk bitiruvchilariga magistrlik diplomlari topshirildi
Termiz davlat pedagogika instituti va Qozon Federal universiteti hamkorligida yo‘lga qo‘yilgan “Qo‘shma ta’lim” dasturi doirasida tahsil olgan magistrantlar navbatdagi muhim bosqichni muvaffaqiyatli yakunladilar.
2024–2025-o‘quv yilida “Ona tili va adabiyoti: rus tili” mutaxassisligi bo‘yicha 1+1 shaklida magistraturaga qabul qilingan talabalar magistrlik dissertatsiyalarini muvaffaqiyatli himoya qilib, ikki oliy ta’lim muassasasi hamkorligidagi ta’lim dasturining ilk bitiruvchilari sifatida diplomlarga sazovor bo‘ldilar.
Himoya jarayonida institutning O‘quv-uslubiy boshqarma boshlig‘i R. Omanov, Magistratura bo‘limi boshlig‘i S. Sattarov, Tillar fakulteti dekani A. Umarov hamda Rus tili va adabiyoti kafedrasi vakillari ishtirok etib, magistrantlarning ilmiy izlanishlari va tadqiqot natijalarini munosib baholadilar.
Bitiruvchilar o‘z ilmiy ishlarida zamonaviy tilshunoslik va adabiyotshunoslikning dolzarb masalalarini tahlil qilib, nazariy hamda amaliy ahamiyatga ega bo‘lgan xulosalarni taqdim etdilar.
Yakunda 10 nafar magistrantga magistrlik diplomlari topshirildi. Ushbu diplomlar ularning ilmiy izlanishlari, mehnati va qat’iyatining yorqin natijasi bo‘ldi.
Termiz davlat pedagogika instituti jamoasi barcha bitiruvchilarni ushbu quvonchli voqea bilan samimiy muborakbod etadi hamda ularning kelgusi ilmiy-pedagogik faoliyatida ulkan muvaffaqiyatlar tilaydi.