Xalqaro kelishuv

Volgograd davlat ijtimoiy-pedagogika universitetida Termiz davlat pedagogika institutining Qo‘shma ta’lim markazi tashkil etildi.

Ayni kunlarda Termiz davlat pedagogika instituti rektori A.Xasanov boshchiligidagi delegatsiya Rossiya Federatsiyasining Volgograd davlat ijtimoiy-pedagogika universitetida rasmiy tashrif bilan bo‘lib turibdi.

Tashrif doirasida ikki oliy ta’lim muassasasi o‘rtasida Volgograd davlat ijtimoiy-pedagogika universiteti huzurida Termiz davlat pedagogika institutining Qo‘shma ta’lim markazini tashkil etish to‘g‘risidagi kelishuv imzolandi. Shuningdek, universitetlar rahbarlari tomonidan Markaz nizomi tasdiqlandi.

Mazkur Markaz oliygohning tarkibiy bo‘linmasi sifatida faoliyat yuritib, fakultet maqomiga ega bo‘ladi.

Markaz faoliyatining asosiy yo‘nalishlari quyidagilardan iborat:

 ta’lim, fan va amaliyot integratsiyasini rivojlantirish;
 ilmiy-pedagog kadrlarni tayyorlash, qayta tayyorlash va malakasini oshirish;
 professor-o‘qituvchilar hamda talabalarning akademik mobilligini kengaytirish;
 qo‘shma ta’lim dasturlarini amalga oshirish va ikki tomon talabalari uchun zamonaviy ta’lim jarayonlarini tashkil etish.



Uchrashuv yakunida ikki oliy ta’lim muassasasi rahbarlari o‘zaro esdalik sovg‘alarini almashib, hamkorlikni yanada rivojlantirishga qaratilgan istiqboldagi rejalarni muhokama qildilar.