Urganchda II xalqaro yozgi maktab o‘z ishini boshladi
Urganch davlat universitetida “Ta’lim va ilm-fan uchun birgalikda yangi istiqbollar yaratish” mavzusidagi O‘zbekistondagi II xalqaro yozgi maktabning tantanali ochilish marosimi bo‘lib o‘tdi.
Nufuzli xalqaro tadbirda Termiz davlat pedagogika instituti vakillari ham faol ishtirok etmoqda.
17–21 avgust kunlari davom etadigan yozgi maktab O‘zbekiston va Germaniya o‘rtasidagi ta’lim va ilm-fan sohasidagi hamkorlikni yanada rivojlantirish, ilg‘or tajribalarni o‘zaro almashish hamda yangi qo‘shma ilmiy-ta’limiy loyihalarni shakllantirishga qaratilgan.
Tadbirda Buxoro, Chirchiq, Farg‘ona, Nukus, Termiz va Urganch shaharlaridagi oliy ta’lim tashkilotlari professor-o‘qituvchilari va talabalari, shuningdek, Germaniyaning Myunster va Vuppertal universitetlari vakillari ishtirok etmoqda.
Termiz davlat pedagogika institutining mazkur xalqaro yozgi maktabdagi ishtiroki institutning xalqaro hamkorlik aloqalarini mustahkamlash, professor-o‘qituvchilar va talabalar o‘rtasida tajriba almashinuvini kengaytirish hamda yangi ilmiy-ta’limiy loyihalarni amalga oshirish uchun muhim imkoniyat yaratmoqda.
Ma’lumot uchun: xalqaro yozgi maktab Erasmus+ KA171 loyihasi doirasida tashkil etilgan.