E’LON Termiz davlat pedagogika instituti yosh olimlari o‘rtasida “EDUGATE 2026” xalqaro ta’lim ko‘rgazmasida ishtirok etish uchun nomzodlarni saralash tanlovi
O‘zbekiston Respublikasi Prezidentining 2023-yil 28-fevraldagi PF–27-son Farmoni bilan tasdiqlangan “2022–2026-yillarga mo‘ljallangan Yangi O‘zbekistonning taraqqiyot strategiyasini “Insonga e’tibor va sifatli ta’lim yili”da amalga oshirishga oid davlat dasturi to‘g‘risida”gi Farmonining 46-maqsadi 167-bandida belgilangan vazifalarni amalga oshirish, oliy ta’lim muassasalarida ilg‘or xorijiy tajribalardan foydalanish samaradorligini oshirish hamda xalqaro hamkorlikni rivojlantirish maqsadida Termiz davlat pedagogika instituti yosh olimlari o‘rtasida tanlov e’lon qilinadi.
Tanlov Oliy ta’lim, fan va innovatsiyalar vazirligining Misr Arab Respublikasining Qohira shahrida 2026-yil 28–30-iyul kunlari o‘tkazilishi rejalashtirilgan “EDUGATE 2026” xalqaro ta’lim ko‘rgazmasida “Study in Uzbekistan” loyihasi doirasida O‘zbekiston oliy ta’lim tashkilotlari ishtirokini ta’minlash bo‘yicha taklifiga asosan tashkil etiladi.
Tanlovning maqsadi
Institutning ilmiy salohiyatini xalqaro maydonda namoyon etish, yosh olimlarni xalqaro ta’lim va ilmiy tadbirlarga jalb qilish, xorijiy oliy ta’lim va ilmiy tashkilotlar vakillari bilan tajriba almashish hamda xalqaro hamkorlik aloqalarini rivojlantirishdan iborat.
Nomzodlarga qo‘yiladigan talablar
Tanlovda quyidagi talablarga javob beradigan Termiz davlat pedagogika instituti yosh olimlari ishtirok etishlari mumkin:
institutda faoliyat yuritayotgan yosh olim, doktorant, tayanch doktorant yoki ilmiy-tadqiqot faoliyati bilan shug‘ullanuvchi yosh mutaxassis bo‘lish;
tegishli yo‘nalish bo‘yicha ilmiy-tadqiqot ishlariga ega bo‘lish;
xalqaro tadbirda institut nomidan munosib ishtirok eta olish;
xorijiy tillardan, xususan, ingliz tilidan yetarli darajada bilimga ega bo‘lish;
xalqaro hamkorlik, ta’lim va ilmiy loyihalarda ishtirok etish tajribasiga ega bo‘lish;
ilmiy maqolalar, tezislar, loyihalar yoki boshqa ilmiy-amaliy ishlarga ega bo‘lish;
institutning xalqaro aloqalari va ilmiy salohiyatini targ‘ib qilishga tayyor bo‘lish.
Tanlov natijalariga ko‘ra, “EDUGATE 2026” xalqaro ta’lim ko‘rgazmasida Termiz davlat pedagogika instituti nomidan ishtirok etish uchun munosib nomzodlar saralab olinadi.
Barcha yosh olimlarni tanlovda faol ishtirok etishga chorlaymiz!