Termiz davlat pedagogika institutida Talabalar amaliyoti bo‘limi xodimlari va “Tadbirkorlik asoslari” fani o‘qituvchilari ishtirokida talabalarga “Kelajak tadbirkori” loyihalari bo‘yicha tushunchalar berilganligi haqida

Yoshlar o‘rtasida tadbirkorlik madaniyatini shakllantirish, ularni mustaqil kasb tanlash va o‘z biznesini yuritishga tayyorlash maqsadida Termiz davlat pedagogika institutida “Kelajak tadbirkori” loyihalari yuzasidan targ‘ibot-tushuntirish uchrashuvi o‘tkazildi. Tadbirda Talabalar amaliyoti bo‘limi xodimlari hamda “Tadbirkorlik asoslari” fani o‘qituvchilari faol ishtirok etdi.

Uchrashuv davomida talabalarga “Kelajak tadbirkori” loyihasining mohiyati, maqsad va vazifalari haqida batafsil tushuncha berildi. Mutaxassislar talabalar zamonaviy bozor iqtisodiyoti sharoitida faqat tayyor ish o‘rnini izlab qolmasdan, o‘z g‘oyasi asosida yangi ish o‘rinlarini yaratuvchi shaxs bo‘lishi lozimligini alohida ta’kidladi.

Shuningdek, ishtirokchilarga quyidagi yo‘nalishlarda amaliy tavsiyalar berildi:

  • biznes g‘oyani tanlash va uni asoslash usullari;
  • oddiy biznes-reja tuzish tartibi;
  • kichik biznes va xususiy tadbirkorlikni ro‘yxatdan o‘tkazish asoslari;
  • davlat tomonidan yoshlar tadbirkorligiga berilayotgan imtiyoz, kredit va grant imkoniyatlari;
  • startap loyihalarni tayyorlash va ularni taqdim etish ko‘nikmalari.

Tadbir davomida talabalar o‘zlarini qiziqtirgan savollarni berib, mutaxassislardan aniq javoblar oldi. Bir qator talabalar o‘z biznes g‘oyalarini bildirib, loyihada ishtirok etishga qiziqish va tayyorlik namoyon qildi.

Tadbir yakunida “Kelajak tadbirkori” loyihasida faol qatnashgan talabalarning g‘oyalarini qo‘llab-quvvatlash, ularga amaliy yordam ko‘rsatish hamda tadbirkorlik bo‘yicha seminar va treninglarni muntazam davom ettirish rejalashtirildi.

Mazkur tadbir talabalarda tadbirkorlik ko‘nikmalarini rivojlantirish, tashabbuskorlik va mustaqil fikrlash qobiliyatini oshirishga xizmat qildi.

Talaabalar amaliyoti bo‘limi boshlig‘i F.Pardayev