TerDPIda “InnoDays” – ilm-fan va innovatsiyalar ko‘rgazmasi bo‘lib o‘tmoqda
TerDPIda “InnoDays” – ilm-fan va innovatsiyalar ko‘rgazmasi bo‘lib o‘tmoqda
Innovatsiya – bu shunchaki texnologik yangilik emas. Bu – yangicha fikrlash, o‘zgarishlarga intilish, muammolarga zamonaviy yondashuv topish va kelajakka o‘z qo‘llaringiz bilan yo‘l ochish demakdir. Aynan shunday ruhdagi tashabbuslarni qo‘llab-quvvatlash va rivojlantirish maqsadida Termiz davlat pedagogika institutida “InnoDays” – ilm-fan va innovatsiyalar ko‘rgazmasi o‘tkazilmoqda.
Tadbirda institut rahbariyati, professor-o‘qituvchilar, respublikaning turli hududlaridan kelgan taniqli olimlar, innovatsion g‘oya yetakchilari, yosh ixtirochilar, shuningdek, TerDPIga biriktirilgan umumta’lim maktablari va texnikumlar o‘quvchilari faol ishtirok etmoqdalar.
Ko‘rgazmaning asosiy maqsadi – bog‘cha, maktab va oliy ta’lim o‘rtasida ilm-fan, ta’lim va ishlab chiqarish integratsiyasini ta’minlash, amaliy bilim va ko‘nikmalar almashinuvini yo‘lga qo‘yishdan iboratdir.
Tadbir doirasida institut kafedralari o‘rtasida “Innovatsion loyihalar va ko‘rgazmalar” namoyishi tashkil etildi. Robototexnika bo‘yicha ilg‘or ishlanmalar taqdim etilib, mutaxassislar va ekspertlar tomonidan baholandi.
Shuningdek, “InnoDays” dasturi doirasida professor-o‘qituvchilar va talabalar ishtirokida “Zakovat” intellektual o‘yini o‘tkazildi. Kimyo yo‘nalishi talabalari tomonidan qiziqarli shou-tajribalari namoyish etildi. Uladan “Ko‘pikli vulqon”, “Sariq cho‘kma sehri”, “Sun’iy qon”, “Neytrallanish” va “Tutun” reaksiyalari kabi tajribalar o‘rin oldi.
Bu kabi tadbirlar nafaqat innovatsion fikrlashni rivojlantiradi, balki yosh avlodni fan, texnologiya va tadqiqotga bo‘lgan qiziqishini kuchaytiradi, ularni ilm-fan orqali o‘z salohiyatini namoyon etishga undaydi.